తిరస్కారం- పాఠం

ఆకాశం తిరస్కరించిందని
ఓ మేఘం
అతిగా కన్నీటిని వర్షిస్తూ
లోకం నుండి అదృశ్యమవ్వాలని
ప్రయత్నిస్తున్న క్షణంలో
నేననుకున్నాను "ఇంత పిచ్చా?" అని

కొండ కాదందని
అంతెత్తు నుండీ ఓ జలపాతం
దూకడానికి సిద్దమౌతున్న క్షణంలో
నేనను కున్నాను"అతి పనికి రాదు"అని.

కానీ
ఇపుడర్ధం అవుతోంది
అతిగా వాంచింపబడినదాని నుండి వచ్చే తిరస్కారం తో
మనసున కలిగే భావాలేంటో .

అయినా
తమ భావాలను నియంత్రించి
మేఘం ఓ చోట నేలనూ
జలపాతం
ఓ నదినీ జీవింపజేయడం చూసి
తెలుసుకున్నా ఓ పెద్ద జీవిత పాఠం

photos-1

ఎండాకాలం - ప్రకృతి

రోజంతా భరించలేనంత వేడి

నా శరీరాన్ని బాధిస్తోంది,

చిన్నప్పుడు క్రికెట్ ఆడి ఆలస్యంగా ఇంటికి వస్తే

నాన్న కొట్టిన దెబ్బల్లా.

సాయంత్రమైతే చాలు

ఎంతటి అలసటనైనా మరిపించే

అతి చల్లటి గాలి

నన్ను చుట్టుకుంటుంది

ఎంతటి కష్టాన్నైనా మైమరిపించే అమ్మ ప్రేమలా .

నేను దారి తప్పుతున్నప్పుడు

సరి చేయడానికి

నాన్నను పంపిన అమ్మే గుర్తొస్తోంది

మధ్యాహ్నం లేకుండా సాయంత్రం ప్రత్యక్షమౌతున్న చల్లని గాలిని చూస్తుంటే.

నా మొహం చూడగానే

కొన్ని సార్లు వెంటనే

ఓదార్చేందుకు అమ్మను పంపే నాన్నే గుర్తొస్తున్నాడు

ఉదయాలు బాధ పెట్టి

సాయంత్రాలు వెన్నెల వెలుగులకు కారణమయ్యే సూర్యుని చూస్తుంటే.

ప్రకృతిని ఎంత శోధించినా ఆశ్చర్యమేగా మానవునికి .

తోడు

భూమీ , పైరూ

కలపబడ్డాయి

ఓ శుభ ముహూర్తం లో

యజమానులైన పెద్దలచే.
భూమి

చాల అందం గా తయారై కనిపించేది

తోడుగా పైరు ఉండగా భరోసాతో.

పైరు చాలా శక్తి తో

ఉత్సాహంగా కనిపించేది

భూమి తనపై తీసుకునే శ్రద్ధతో .

పైరు మరణించింది

ఓ రోజు హఠాత్తుగా .
అంతే

బద్దలైంది

భూమి హృదయం,

అందవిహీనమైంది

దాని శరీరం నెర్రెలతొ.

కనీసం

నీరు పెట్టే వారు కూడా లేరు

ఇపుడు దానికి,

పంట లేదని.

జతకట్టబడితే బాగుండు,
ఆ భూమి త్వరగా

తనకు నచ్చిన ఏ పైరుతో అన్నా .

ఒంటరిగా ఉండడం కష్టం కదా !జీవితాంతం.

తేడాలు ఇంకా ఉన్నాయి

నేను, మా లైన్ మ్యాన్ కలిసి అలా మణికంఠ హోటల్ వరకూ వెళ్ళాము. అక్కడ ఆ హోటల్ ఓనర్ కలిసాడు.వాళ్ళ అబ్బాయి,మా లైన్ మ్యాన్ వాళ్ళ అబ్బాయి కలిసి చదివారంట.మీ అబ్బాయి ఎలా వున్నాడు అని మా లైన్ మ్యాన్ అతన్ని అడిగాడు.అతను ఇక చెప్పడం మొదలు పెట్టాడు నాకు.
' వాడి చదువు కి ,ఉద్యోగానికి 10 లక్షలు ఖర్చు పెట్టాను సార్ .వాడేమో ఎవరో గౌండ్లోల్ల పిల్లను చేసుకున్నాడు. కోటి రూపాయలు కట్నం ఇస్తామన్నా వదులు కున్నాడు సార్.నెలకు 2 లక్షలు వచ్చే ఉద్యోగాన్ని వదులుకోని దాని కోసం హైదరాబాద్ లో 40 వేలకు చేస్తున్నాడు సార్.వాడు చచ్చినట్టే మాకు 'అన్నాడు.

అంతలోనే మా లైన్ మ్యాన్ '' ఆ అమ్మాయి వాళ్ళ ఫ్యామిలి మంచిదంటలే సార్.ఆ అబ్బాయి మా ఇంటికి వచ్చిన్నప్పుడు చెప్పాడు.అమ్మాయి వాళ్ళ ఇంట్లో అందరూ మంచి అఫీషియల్స్ అంట సార్ '' అన్నాడు.

వెంటనే ఆ అబ్బాయి వాళ్ళ నాన్న'' ఎంత అఫీషియల్ అయితే ఏంటి సార్.ఎంత అఫీషియల్ అయినా మాదిగోడు మాదిగోడే వేరే వాడు వేరే వాడే కద సార్.ఇది కూడా అంతే సార్.వాడి ఇంటికి నా జీవితంలో వెళ్ళేది ఉండదు సార్.చచ్చినట్టే వాడు మాకు.' అంటుండగా అక్కడనుండి ప్రక్కకు నడిచాను మాదిగనైన నేను.

బాధేస్తోంది విడివడడం అంటేనే.

ఓ సామాన్య మానవుడిగా

బాధేస్తోంది

విడిపోవడం అంటేనే.

నాకు తెలుసు

విడిపోయినా ,కలిసున్నా

నాకు మారేది ఏమీ ఉండదని.

ఐనా ఏదో బాధ.

విడిపడి బాగు పడతాంఅని వారంటున్నారు.

చీలికలై చులకనౌతాం అని కొందరంటున్నారు.
ఏది సరైందో ,

అందరికీ ఏది ఎక్కువ మేలు చేస్తుందో

అర్ధం కాని సామాన్యుడ్ని .

ఐనా

ఏదో బాధ గుండెల్లొంచి నిజంగా.

నిజమైన ప్రజల మాటల్లో

స్వచ్చత వుంటుంది చాలా వరకూ.

కానీ

రాజకీయ గుంటనక్కల్నే

విశ్వసించలేకపోతున్నా.

నాకు తెలుసు

వారిని ఎన్నుకున్నాక

నా నిమిత్తం వుండదు మంచికైనా, చెడు కైనా.

ఐనా

స్వానుభవం చెబుతోంది

రాజకీయ పక్షాలు చేసే ప్రతి పనిలోనూ

స్వార్ధ పూరిత స్వలాభం ముందు,

ఆ తరువాతేఏ ప్రజా శ్రేయస్సైనా అని.

ఇన్ని తెలిసీ

బాధేస్తోంది విడివడడం అంటేనే.

కోరుకుంటున్నా అందరికీ మంచి జరగాలని.

అలసిన మనసుతో........

తెలియని తపనేదో
నను తరుముతు ఉంటే,
పరుగెడుచున్నాను
తుది ఎరుగని గమ్యానికి.

చేరిన
ప్రతి మజిలీ
తుది మజిలీ
తను కాదని అనిపిస్తుంటే,
అపరిమిత
అనుభవ మూటను మోసుకుంటూ
నిత్యాసంతృప్తితో
అలసిన మనసుతో
పరుగులెడుతూ ,
మనసుని
సంపూర్తిగా సంతృప్తిపరిచే
తుది మజిలీ శోధిస్తూ ,

అపుడపుడూ
సేద తీరుతున్నా,
మనసుని మాటల్లోకి మారుస్తూ.